غم حیات کی منزل سے پار ہو جاؤں

غم حیات کی منزل سے پار ہو جاؤں

جو بے قرار ہیں ان کا قرار ہو جاؤں

خزاں کے دور نے جھلسا کے رکھ دیا ہے مجھے

بہار آئے تو نذر بہار ہو جاؤں

ملے جو ساقی جاناں کے ہاتھ سے ساغر

قسم خدا کی میں نذر خمار ہو جاؤں

دیار عشق و محبت ہے چل ادب سے یہاں

ٹھہر نسیم گل نو بہار ہو جاؤں

حسین ابن علی کی محبتوں کے نثار

سلام جب بھی پڑھوں اشک بار ہو جاؤں

حضور جن سے کیا کرتے تھے حجاب ارشدؔ

انہیں کیا صدقہ ملے پردہ دار ہو جاؤں