zada-e-rah-e-baqa ghair az fana milta nahin

zāda-e-rāh-e-baqā ġhair az fanā miltā nahīñ

hai ḳhudī jab tak ki insān meñ ḳhudā miltā nahīñ

justujū rahtī hai daulat kā patā miltā nahīñ

sar phirā karatā hai par zill-e-humā miltā nahīñ

hai tajassus shart yahāñ malne ko kyā miltā nahīñ

par kahīñ duniyā meñ sādiq āshnā miltā nahīñ

chashm-e-nai kī muddatoñ gardish to paayā ek til

rizq insāñ ko muqaddar se sivā miltā nahīñ

al-madad mauqa' madad kā hai ye ai bād-e-murād

Dūbtī hai apnī kashtī nā-ḳhudā miltā nahīñ

gumrahī ḳhud manzil-e-maqsūd kī hai rahnumā

ḳhizr mil jaate haiñ jis ko rāstā miltā nahīñ

shā'irān-e-hāl kyā mazmūn-e-nau paa.eñ 'asīr'

DhūñDhte haiñ ye taḳhallus bhī nayā miltā nahīñ

zada-e-rah-e-baqa ghair az fana milta nahin

hai KHudi jab tak ki insan mein KHuda milta nahin

justuju rahti hai daulat ka pata milta nahin

sar phira karata hai par zill-e-huma milta nahin

hai tajassus shart yahan malne ko kya milta nahin

par kahin duniya mein sadiq aashna milta nahin

chashm-e-nai ki muddaton gardish to paya ek til

rizq insan ko muqaddar se siwa milta nahin

al-madad mauqa' madad ka hai ye ai baad-e-murad

Dubti hai apni kashti na-KHuda milta nahin

gumrahi KHud manzil-e-maqsud ki hai rahnuma

KHizr mil jate hain jis ko rasta milta nahin

sha'iran-e-haal kya mazmun-e-nau paen 'asir'

DhunDhte hain ye taKHallus bhi naya milta nahin