جادۂ راہ بقا غیر از فنا ملتا نہیں

جادۂ راہ بقا غیر از فنا ملتا نہیں

ہے خودی جب تک کہ انسان میں خدا ملتا نہیں

جستجو رہتی ہے دولت کا پتا ملتا نہیں

سر پھرا کرتا ہے پر ظل ہما ملتا نہیں

ہے تجسس شرط یہاں ملنے کو کیا ملتا نہیں

پر کہیں دنیا میں صادق آشنا ملتا نہیں

چشم نے کی مدتوں گردش تو پایا ایک تل

رزق انساں کو مقدر سے سوا ملتا نہیں

المدد موقع مدد کا ہے یہ اے باد مراد

ڈوبتی ہے اپنی کشتی نا خدا ملتا نہیں

گمرہی خود منزل مقصود کی ہے رہنما

خضر مل جاتے ہیں جس کو راستا ملتا نہیں

شاعران حال کیا مضمون نو پائیں اسیرؔ

ڈھونڈھتے ہیں یہ تخلص بھی نیا ملتا نہیں