تم رنگ ہو سخن میں تم پھول ہو چمن میں

تم رنگ ہو سخن میں تم پھول ہو چمن میں

تم روح ہو بدن میں تم شمع انجمن میں

رونق جو تھی گلوں کی سب ہو گئی وہ مٹی

ان کی نظر جو بدلی خاک اڑ گئی چمن میں

باہم یہ تذکرہ ہے جلاد چرخ کیا ہے

لوہا برس رہا ہے بانکوں کی انجمن میں

حب یار سے ملا میں غمگیں تھا خوش ہوا میں

مردہ تھا جی اٹھا میں جان آ گئی بدن میں

تم سیر کو جو آتے اک طرفہ گل کھلاتے

پھولے نہ پھر سماتے گل اپنے پیرہن میں

خاموش اسیرؔ ہر دم رہتا ہوں مثل خاتم

ہوں نامدار عالم پر مہر ہے دہن میں