جب سے دل شیدا ہوا ہے اس بت بے پیر کا

جب سے دل شیدا ہوا ہے اس بت بے پیر کا

بادشاہ میں بن گیا ہوں رنج کی جاگیر کا

دیکھ کر تصویر اپنی بن گئے تصویر وہ

خوب جھگڑا ہوگا اب تصویر سے تصویر کا

ہے سر بالیں مسیحا اور ملک الموت بھی

اب تقاضا دیکھنا تدبیر سے تقدیر کا

خاک پائے دل ربا لانا طبیبو ڈھونڈھ کر

کام مٹی سے لیا جاتا ہے اب اکسیر کا

کس کو ڈھونڈوں کون اے اصغرؔ پڑھے تحریر کو

کچھ پڑھا جاتا نہیں لکھا میری تقدیر کا