پیکر موم تھا کچھ عزم دکھایا میں نے

پیکر موم تھا کچھ عزم دکھایا میں نے

حسن والے تجھے پتھر سا ہی پایا میں نے

کر سکی روح معطر نہ میری تو آ کر

پاؤں نکہت تیری جانب بھی بڑھایا میں نے

میں یہ سنتا تھا کہ کانٹے ہی چبھن دیتے ہیں

زخم پھولوں سے مگر دیکھیے کھایا میں نے

لوگ تو شعلۂ آتش سے ڈرا کرتے ہیں

خود کو شبنم سے سر بزم جلایا میں نے

اب خوشی اور کہاں جا کے ملے گی مجھ کو

تحفۂ غم تو مسرت سے ہی پایا میں نے

میں تیری چاہ میں اے زیست وہاں تک پہنچا

ہاتھ بھی موت کے ہاتھوں سے ملایا میں نے

کہتا آصفؔ ہے یہ نا کام تمنا ہو کر

جذبۂ دل تجھے بیکار گنوایا میں نے