وہ ہاتھ آئیں تیرے واعط کہاں سے

وہ ہاتھ آئیں تیرے واعظ کہاں سے

جو بیعت کر چکے پیر مغاں سے

کرے وہ عشق کا دعوی زباں سے

نہ منہ موڑے جو تیغ امتحاں سے

ازل میں اور ابد میں فرق کیا ہے

وہیں جائیں گے آئے تھے جہاں سے

رسائی کیا اس جان جہاں تک

ہے آگے جس کی منزل لا مکاں سے

خودی چھوڑے مٹئے اپنی ہستی

کرے جو دوستی اس بے نشاں سے

خم ابرو پہ مفتوں ہو گیا دل

کیا اس نے مجھے گھائل کماں سے

ستم کب تک اٹھاؤں ان بتوں کے

جگر پتھر کا میں لاؤں کہاں سے

نہیں مقتل میں اس نے تیغ تولی

اٹھایا ہاتھ اس نے امتحاں سے

خدا کی بندگی اوگھٹؔ کریں اب

کہ دل گھبرا گیا جور بتاں سے