وہاں وہ ہیں باغ ہے غیر ہیں بط مے ہے جام شراب ہے

وہاں وہ ہیں باغ ہے غیر ہیں بط مے ہے جام شراب ہے

یہاں میں ہوں سوز فراق ہے مرا سینہ غم سے کباب ہے

وہ بلا کا شعبدہ باز ہے کہ عیاں ہے اور نہاں بھی ہے

یہ اسی کا جلوہ ہے چار سو مگر اس کے رخ پہ نقاب ہے

یہ غضب ہے دیر و حرم میں سب کریں سنگ بوسی تو ایک سی

یہ کہے ہے واعظ خود غرض وہ ثواب ہے یہ عذاب ہے

پھرا خالی ہاتھ جو نامہ بر ہے یقین سنائے گا یہ خبر

وہ رہے سکوت میں دیر تک یہی خط کا تیرے جواب ہے

کرے حسن و عشق میں بحث کیا نہیں واقف اوگھٹؔ بے نوا

بخدا کہ مکتب عشق میں ابھی اس کی پہلی کتاب ہے