شیخ نے کی رہن مے دستار آج

شیخ نے کی رہن مے دستار آج

مل گیا رندوں میں یہ ابرار آج

خواب میں دیکھا ہے روئے یار آج

بخت خفتہ ہو گیا بیدار آج

شام کو آئے گا وہ بالائے بام

صبح سے بیٹھیں پس دیوار آج

کل ہی دیکھے تھے لب جاں بخش یار

ہو گیا اچھا دل بیمار آج

دیکھ لیں گر اس کو شیخ و برہمن

توڑ ڈالیں سبحہ و زنار آج

کس کا لے گا امتحاں کھلتا نہیں

باندھ کر نکلا ہے وہ تلوار آج

المدد اے وارث عالم پناہ

کیجیے اوگھٹؔ کا بیڑا پار آج