ادا پر کوئی مرتا ہے کوئی مفتوں ہے چتون پر

ادا پر کوئی مرتا ہے کوئی مفتوں ہے چتون پر

ہزاروں کے گلے کٹتے ہیں ان کے حسن و جوبن پر

ہم ہی کو قتل کرتے ہیں ہم ہی سے کہے جاتے ہیں

رہے گا حشر تک یہ بار احساں تیری گردن پر

سمجھ کر کھیل مقتل میں اٹھایا نیمچہ جس دم

لگے ہنسنے وہاں زخم قاتل کے لڑکپن پر

ستم ایجاد ہے ظالم ادا سے قتل کرتا ہے

گلے ملنے میں رکھ دی تیغ ابرو میری گردن پر

یہ ڈر ہے داور محشر سے گر داد ستم چاہوں

خدا کو رحم آ جائے نہ قاتل کے لڑکپن پر

رقیبوں کا مقدر کاش مل جاتا مجھے اوگھٹؔ

کبھی تو فاتحہ پڑھنے وہ آتے میرے مدفن پر