ازل سے قافلہ اب تک رواں ہے

ازل سے قافلہ اب تک رواں ہے

نہیں معلوم کچھ جانا کہاں ہے

بہت دل بستگی اس سے نہ کریے

جہان رنگ و بو وہم و گماں ہے

کئی دن سے ہے دل میں ایک الجھن

نہیں معلوم کیا راز نہاں ہے

زبان شوق کی دیکھو بلاغت

خموشی میں نہاں صد داستاں ہے

کوئی معیار ہی باقی نہیں اب

جسے دیکھو وہ میر کارواں ہے

جبین شوق ہے مائل بسجدہ

خدا وندا یہ کس کا آستاں ہے

سنبھل کر بیٹھیے گا شیخ صاحب

سعیدؔ شاعرِ جادو بیاں ہے