دے دیا ہے دل و جگر اس کو

دے دیا ہے دل و جگر اس کو

جان کر یہ کہ با وفا ہوگا

بعد مرنے کے کس کو کس کا پتا

خاک میں جسم مل گیا ہوگا

خیر سے آج کٹ گئی ہے عمر

دیکھیے کل کے روز کیا ہوگا

حسن پر ہے تمہیں غرور بہت

اک نہ اک روز یہ فنا ہوگا

رنج ہے فکر ہے تردد ہے

تم نہ ہو گے تو اور کیا ہوگا

نامہ بر نے دیا جو تھا کل خط

دل میں میرے لکھا ہوا ہوگا

عشق کی راہ سے نہیں ممکن

ایک انسان بھی بچا ہوگا

اک عمل ہی بروز حشر اظہرؔ

توشۂ عاقبت ترا ہوگا