غم سے مرا کب حال پریشاں نہیں دیکھا

غم سے مرا کب حال پریشاں نہیں دیکھا

کب اس دل صد چاک کو گریاں نہیں دیکھا

شکوہ مرے رونے کا عبث کرتے ہو یارو

کب زخم جگر کو مرے خنداں نہیں دیکھا

اترا کے نہ چل کبک دری باغ میں اتنا

تونے ابھی اس گل کو خراماں نہیں دیکھا

دیکھا تو حرم میں بھی پرستش ہے اسی کی

اس بت سا کوئی دشمن ایماں نہیں دیکھا

اے شمع شب افروز ترے حسن کا جلوہ

کس رنگ میں کس روپ میں پنہاں نہیں دیکھا

کھو بیٹھا ہے دل جو کہ تھا گنجینۂ اسرار

مائل سا بھی ہشیار نگہباں نہیں دیکھا