یا شرح سوز دل ہے یا درد کا بیاں ہے

یا شرح سوز دل ہے یا درد کا بیاں ہے

جو شعر ہے ہمارا اک غم کی داستاں ہے

پھنکتا ہوں سوز غم سے سینہ میں دل تپاں ہے

پھر عشق زخم دل پر میرے نمک فشاں ہے

ہے سانس یعنی مشکل دل اس قدر تپاں ہے

اس نیم قطرہ خوں میں کیا زور الاماں ہے

بے شبہہ سب کے دل میں تیری جگہ ہے کافر

تو کیا پھرا کہ ہم سے برگشتہ اک جہاں ہے

سوز دروں سے دل میں اک آگ سی لگی ہے

آہوں کے بدلے لب پر ہر وقت اک دھواں ہے

لو کہہ چکے بہت کچھ بس اب زباں سنبھالو

منہ میں مرے بھی آخر اے جان جاں زباں ہے

وعدوں پہ تیرے اے بت امید مغفرت ہے

پیماں شکن نہ ہونا اللہ درمیاں ہے