مجھ سے ہر آدمی کو نفرت ہے

مجھ سے ہر آدمی کو نفرت ہے

یہ ترے عشق کی بدولت ہے

غیر بھی کرتے ہیں گلا تیرا

کچھ مجھی کو نہیں شکایت ہے

مردے اٹھنے لگے مزاروں سے

ان کا آنا بھی اک قیامت ہے

واعظو جاؤ اپنا کام کرو

کوئے جاناں ہماری جنت ہے

کیا تردد ہو اپنے مدفن کا

کوچۂ یار تو سلامت ہے

بوسہ مانگا تو منہ بنا کے کہا

ایسی باتوں سے مجھ کو نفرت ہے

توبہ مے سے بہار میں واعظ

یہ بھی اک آپ کی حماقت ہے

اپنے دل کا مجھے گلا ہے امیرؔ

کچھ نہیں غیر کی شکایت ہے