صحت نے تم کو خوب ابھارا ہے آج کل

صحت نے تم کو خوب ابھارا ہے آج کل

واللہ کیا شباب تمہارا ہے آج کل

تیرا ستم وفا سے بھی پیارا ہے آج کل

دے زہر بھی مجھے تو گوارہ ہے آج کل

دنیا کی راحتوں سے کنارا ہے آج کل

میں ہوں اور اک خیال تمہارا ہے آج کل

دل میں بسی ہوئی ہے کوئی صورت حسیں

شیشے میں اک پری کو اتارا ہے آج کل

دل جس میں میری آرزؤں کی تھی بود و باش

ملکیت بتان خود آرا ہے آج کل

کچھ کچھ بچی کھچی سی امیدوں کے ساتھ ساتھ

غم نے بھی دل میں پیر پسارا ہے آج کل

تم کو اگر ہماری محبت سے عار ہے

ہم نے بھی اپنے نفس کو مارا ہے آج کل

تیرا اگر یہی ہے تغافل تو پھر بتا

تیرے بغیر کون ہمارا ہے آج کل

اے دل زمین عشق پہ رکھ پھونک کر قدم

دنیا کا ذرہ ذرہ شرارا ہے آج کل

دعوت کسی عزیز کی قسمت میں کب اثرؔ

ہوٹل کی روٹیوں پر گزارا ہے آج کل