کیوں دل کو تڑپ ہے آٹھ پہر کیوں چپکے چپکے رونا ہے

کیوں دل کو تڑپ ہے آٹھ پہر کیوں چپکے چپکے رونا ہے

کچھ سچ تو بتا اے بخت سیہ اب ہجر کی شب کیا ہونا ہے

ہے مرگ عدو کا غم کس کو ہے جام و سبو کا غم کس کو

رونا ہے مجھے یہ آٹھ پہر کیوں غیر کا ان کو رونا ہے

وہ رشک چمن وہ غنچہ دہن تھے پھول سے جن کے نازک تن

اب بعد فنا اک عالم ہو مٹی ہی لحد کا کونا ہے

پھر ہجر کی شب لب پر ہے فغاں سینے میں کھٹک ہے دل میں خلشؔ

آثار برے آتے ہیں نظر معلوم نہیں کیا ہونا ہے

مر مر کے خلشؔ ہو خاک بسر اور بعد فنا تم لو نہ خبر

جو حسرت ہے یہ حسرت ہے جو رونا ہے یہ رونا ہے