خدا کو یاد کر کیوں ملتجی ہے کیمیا گر سے

خدا کو یاد کر کیوں ملتجی ہے کیمیا گر سے

کہ سونا خاک سے ہوتا ہے پیدا لعل پتھر سے

غضب میں جان ہے ہر دم دعا کرتا ہوں داور سے

محبت جائے دل سے یہ بلا نکلے مرے گھر سے

مرے پر بھی اثر دیکھا یہ اپنی اشکباری کا

بخارات زمیں اٹھ اٹھ کے اکثر گور پر برسے

رلایا ہم کو کیا کیا بے وفا نے منھ نہ دکھلایا

ہماری دیدۂ تر عمر بھر دیدار کو ترسے

مرا قاتل پلائے گا مجھے شربت شہادت کا

خبر یہ کون لایا ہے بھرو منہ اس کا شکر سے

جبینِ یار سے افشاں کی دیکھی ذرہ افشانی

خوشی کے پھول جھڑتے ہیں چراغ ماہِ انور سے

نہ گذرے چار دن بھی چین سے اس کی محبت میں

بہت روئے بہت پیٹے بہت تڑپا بہت ترسے

کٹی برسات بحرؔ اس سال بھی فریاد و شیون میں

خبر ہم کو نہیں بادل کدھر آئے کدھر برسے