آرزو دیدار کی ہے نکلے کیا ہجراں میں دم

آرزو دیدار کی ہے نکلے کیا ہجراں میں دم

رک رہا ہے یار میرے دیدۂ حیراں میں دم

دونوں عالم ہو گئے بسمل پ تیزی ہے وہی

ہے قیامت یار تیرے خنجر براں میں دم

یار کے کوچہ میں یا رب اپنا لاشہ دفن ہو

اور نکلے وقت مردن محفل جاناں میں دم

تیر میں پیکاں تو دم پیکاں میں پہلو سے نہ کھینچ

ہے مرا سفاک اب اٹکا ہوا پیکاں میں دم

پاس ناموس ادب ہے ورنہ پہنچے تا فلک

ہے ابھی اتنا مری آہ شرر افشاں میں دم

ناتواں ہو کر پڑے ہیں تو نہ کوچہ سے اٹھا

اب نہیں باقی ترے عشاق سرگرداں میں دم

آرزوئے دین دنیا اب نہیں بہرامؔ کچھ

پر مرا نکلے امید رحمت یزداں میں دم