اک جہاں ہے محو حیرت کیا کہوں

اک جہاں ہے محو حیرت کیا کہوں

اپنی روداد محبت کیا کہوں

میرا ہر آنسو ہے میرا راز دل

اب میں ان اشکوں کی قسمت کیا کہوں

خود سمجھ لیں گے وہ میرا حال دل

اپنا ارماں اپنی حسرت کیا کہوں

آ گئے وہ رخ سے سرکائے نقاب

ہو گئی طرفہ قیامت کیا کہوں

دید جاناں یاد جاناں فکر دوست

ہے یہ ہر عالم عبادت کیا کہوں

رہروی ہی رہروی اور کچھ نہیں

منزل جاناں کی حالت کیا کہوں

جام کے بدلے ملائی ہے نظر

آج ساقی کی عنایت کیا کہوں

وہ مجھے خوشیاں عطا کرتے ہیں کیوں

مجھ کو ہے غم کی ضرورت کیا کہوں

مجھ سے ہیں بہزادؔ وہ خواہان دل

میں ہوں پابند مروت کیا کہوں