وہی صبح جس میں مجھ کو تیری کچھ خبر نہ آئے

وہی صبح جس میں مجھ کو تیری کچھ خبر نہ آئے

میرے دورِ زندگی میں کبھی وہ سحر نہ آئے

مری چشمِ جستجو کی یہ عجیب آرزو ہے

کہ کبھی وہ سامنے ہو کبھی وہ نظر نہ آئے

مجھے غم نہیں خوشی ہے یہی درد زندگی ہے

میری چارہ سازیوں کو کوئی چارہ گر نہ آئے

میرے غم کی کیا دوا ہو، مجھے کس طرح شفا ہو

میرا ذوق دید کیا جو تو ہی نظر نہ آئے

تیرے میکدے کا ہم نے یہ عجیب طور دیکھا

کہ جو آئے بے خبر ہو، کوئی باخبر نہ آئے

میری پر حجاب نظر و ذرا اتنا دھیان رکھنا

کہ وہ سامنے بھی آئے تو تمہیں نظر نہ آئے

نہیں لطف بندگی کا نہیں کیف زندگی کا

جو جبیں کے پاس کھینچ کر ترا سنگِ در نہ آئے

وہ حرم کہ بت کدہ ہو، وہ چمن کہ میکدہ ہو

وہاں جا کے ہم کریں جہاں تو نظر نہ آئے

میرا حال کب زبوں ہے، یہ تڑپ نہیں سکوں ہے

مجھے چین یا الٰہی کبھی عمر بھر نہ آئے

تھی یگانہ وہ نظر بیگانہ بن کر رہ گئی

زندگی افسانہ در افسانہ بن کر رہ گئی

قہقہوں سے کب میرا ٹوٹا ہوا دل جڑ سکا

بے بسی پھر زینتِ کاشانہ بن کر رہ گئی

عام ہوتا کس طرح رازِ نہانِ میکدہ

تشنگی رہنِ حدِ میخانہ بن کر رہ گئی

اے ہجوم نامرادی اے وفور بیخودی

مستئی دل آخرش ویرانہ بن کر رہ گئی

دل میں تو نے کی تو اپنی ہوہ فرمائی مگر

یہ تجلی بھی چراغ خانہ بن کر رہ گئی

اب تیری آنکھوں میں بھی آنسو نظر آنے لگی

تیری دنیا بھی میرا غم خانہ بن کر رہ گئی

یا الٰہی کون آیا ہے نقاب الٹے ہوئے

شمعِ محفلِ آج کیوں پروانہ بن کر رہ گئی

کیا مزہ دینے لگا اس کو سجودِ سنگِ در

کیوں جبین وقفِ بتِ بت خانہ بن کر رہ گئی

عاشقی کی کشمکش بہزادؔ ایسی چیز ہے

زندگی ٹوٹا ہوا پیمانہ بن کر رہ گئی