ان کے نازک دل کو بھی احساس ارماں ہو چلا

ان کے نازک دل کو بھی احساس ارماں ہو چلا

رفتہ رفتہ ان کا عالم بھی پریشاں ہو چلا

بہکی بہکی سی نظر ہے سہمی سہمی سی نگاہ

سنتے سنتے حال میرا غم نمایاں ہو چلا

ناز میں آنکھوں سے پیہم اشک جاری ہو گئے

موجۂ اشک الم بھی موج طوفاں ہو چلا

اور آنسو آنکھ سے پیہم گرے مستانہ وار

ایک اشک نا مرادی زیب مژگاں ہو چلا

فصل گل اے فصل گل ہاں تیری قربان جائیے

اب مجھے احساس دامان و گریباں ہو چلا

پھر وہی زلفیں اسی چہرے پہ آکر چھا گئیں

پھر وہی عالم مراد دین و ایماں ہو چلا

اب سکوں پانے لگا دل اضطراب شوق سے

یعنی اک قیدیٔ غم مانوس زنداں ہو چلا

اس نگاہ ناز نے بخشا تھا جو روز ازل

رفتہ رفتہ وہ شرارہ مہر تاباں ہو چلا

ہائے اے بہزادؔ اپنے دل کا عالم کیا کہوں

یا گلستاں بن چلا تھا یا بیاباں ہو چلا