اب اور کیا طلب کریں اپنی زباں سے ہم

اب اور کیا طلب کریں اپنی زباں سے ہم

سب کچھ تو پا چکے ہیں ترے آستاں سے ہم

گھبرا کے کہہ دیا نگہہ انتظار نے!

اب تک نہ کہہ سکے تھے جو اپنی زباں سے ہم

بے دل سے بے خیال سے بے اعتبار سے

کھیلا کیے فضائے بہار و خزاں سے ہم

آغاز عشق یہ ہے کہ انجام شوق ہے

کچھ بدگماں سے وہ ہیں تو کچھ بدگماں سے ہم

صد شکر پھر قفس میں بہلنے لگا ہے دل

مانوس ہو چلے ہیں غمِ آشیاں سے ہم

روداد زندگی میں جو ہے ذکرِ بیخودی

یہ وہ جگہ ہے بھول گیے ہیں جہاں سے ہم

بہزادؔ ذوق و شوق کے قربان جائیے

لپٹے ہوئے ہیں دامنِ پیرِ مغاں سے ہم