تیری نظروں میں محبت کا ہے طوفاں ساقی

تیری نظروں میں محبت کا ہے طوفاں ساقی

تجھ پہ صدقے میری دنیا میرا ایماں ساقی

پے بہ پے جام جو کرتا ہے عطا رندوں کو

لطف پہ لطف ہے احساں پہ ہے احساں ساقی

تجھ کو کیا دیکھ کیا صبح تجلی دیکھی

دل کے عالم کا ہے اللہ نگہباں ساقی

اب تو یہ حال ہے اک سادہ ورق ہو جیسے

کوئی حسرت ہے نہ خواہش ہے نہ ارماں ساقی

جام اٹھاتا ہوں تو مے ملتی ہے لبریز مجھے

اپنے عالم نے کیا ہے مجھے حیراں ساقی

اور رندوں کو عطا کر مئے و صہبا و سبو

مجھ کو کافی ہے تیرا گوشہ اماں ساقی

اس طرف بھی تو کبھی ہو تیری کافر نظری

آج بہزادؔ کو بھی کر دے مسلماں ساقی