اک ستم گر کو پیار کون کرے

اک ستم گر کو پیار کون کرے

زیست کو بیقرار کون کرے

جب کہ سنتا نہیں کوئی فریاد

پھر فغاں بار بار کون کرے

غم سہے کون اس کی فرقت میں

جبر کو اختیار کون کرے

کیا خبر یہ بھی پھیر لے آنکھیں

درد کا اعتبار کون کرے

کہیں عادت نہ دل کو ہو جائے

آپ کا انتظار کون کرے

سننے والا ہی جب نہیں کوئی

ذکر صبح بہار کون کرے

جن کو ساقی نے کر دیا بے خود

اب انہیں ہوشیار کون کرے

اب کسے اپنی جان دوبھر ہے

حسن والوں کو پیار کون کرے

ہم تو اپنے میں کھو گئے بہزادؔ

سجدہ اک سمت یار کون کرے