رتبہ کوٹھے کا قد بالا سے بالا ہو گیا

رتبہ کوٹھے کا قد بالا سے بالا ہو گیا

طور کی چوٹی عصائے دست موسیٰ ہو گیا

بیٹھ کر روئے جہاں غربت میں دریا ہو گیا

چار آنسو جب گرے آنکھوں سے چوکا ہو گیا

شوخی رنگ گل رخسار اس پر ختم ہے

عکس سے لعل یمن ہیرے کا بندا ہو گیا

خط نکلتے ہی ملاقاتیں ہوئیں باہم کی ترک

میرا ان کا حکم حاکم سے مچلکہ ہو گیا

فی الحقیقت وہ پری رو چودھویں کا چاند ہے

چادر مہتاب پرتو سے دوپٹا ہو گیا

کھیل سمجھا کار و بار عالم فانی کو برقؔ

آنکھ کو نظارۂ ہستی تماشا ہو گیا