یہ جو چشم پُر آب ہیں دونوں

یہ جو چشم پُر آب ہیں دونوں

بحرِ غم کے حباب ہیں دونوں

چشمِ جام شراب ہیں دونوں

ان سے عالم خراب ہیں دونوں

ہم نے دیکھا جو ان کی آنکھوں کو

نرگسِ نیم خواب ہیں دونوں

گو نہیں میں تری سواری میں

جان و دل ہمرکاب ہیں دونوں

وصل میں فکر ہے جدائی کا

وصل و فرقت عذاب ہیں دونوں

کچھ تو کر ہم کو، قتل کر یا خوش

یہ تو کارِ ثواب ہیں دونوں

دیر میں برہمن، حرم میں شیخ

تیرے پیچھے خراب ہیں دونوں

آتشِ ہجر سے حریقؔ اب تو

جگر و دل کباب ہیں دونوں