وہ نہ ہوں تخئیل میں بھی دل کا جب ماتم رہے

وہ نہ ہوں تخئیل میں بھی دل کا جب ماتم رہے

ہم نفس ان کا تصور کیوں شریک غم رہے

دیدنی ہے اختیار گریہ پر یہ صبر و جبر

ہائے وہ آنسو کہ جو آنکھوں میں آکر تھم رہے

تم سراپا حسن ہو پر عشق سے بیگانہ ہو

یہ وہ دنیا ہے کہ اس دنیا میں ہم ہی ہم رہے

دینے والے لذت غم ہی نہ کھو دینا کہیں

دے اور اتنا دے مجھے احساس رنج و غم رہے

فکر رہتی ہے یہی بگڑے نہ ظالم کا بناؤ

ہم کو الجھن ہو تو ہو زلفوں میں پیچ و خم رہے

مسکراتے بزمؔ کی بالیں پہ آ جائیں جو آپ

زندگی کو رشک ہو وہ موت کا عالم رہے