بے سکونی میں سکون قلب ہے حاصل مجھے

بے سکونی میں سکون قلب ہے حاصل مجھے

اضطراب دل نہیں ہے اضطراب دل مجھے

کھینچ لوں منزل کو میں یا کھینچ لے منزل مجھے

ہے بہر صورت یقین جذبۂ کامل مجھے

کر دیا ہے بے خودی نے آج اس قابل مجھے

اپنے پہلو میں لیے لیتی ہے خود منزل مجھے

ذوق آسانی سے مطلق ہو چکا نا آشنا

اب کوئی مشکل نظر آتی نہیں مشکل مجھے

چشم حق بیں ہو چکی ہے شاد کام آرزو

توڑتا ہے اب طلسم جلوۂ باطل مجھے

میری فطرت تو ازل ہی سے تھی آزادی پسند

کیوں کسی نے کر دیا پابند آب و گل مجھے

مرحبا اے اضطراب ذوق تکمیل طلب

لے اڑی ہے جانب منزل ہوائے دل مجھے

ہو چکا ہوں بے نیاز شوق و ذوق آرزو

اب لبھا سکتی نہیں رنگینیٔ محفل مجھے

اس نگاہ ناز کے پر کیف جلووں کی قسم

اب کہاں ممکن سکون اضطراب دل مجھے

مرحبا جوش تمنا مرحبا ذوق نظر

ہو گئی تمییز حسن و عشق میں مشکل مجھے

مشکلات راہ ہیں ہمت شکن شائقؔ مگر

شوق منزل کھینچتا ہے جانب منزل مجھے