بیدار کروں کس کو میں اظہار محبت

بیدار کروں کس کو میں اظہار محبت

بس دل ہے مرا محرم اسرار محبت

اے شمع دل افروز شب تار محبت

تجھ سے ہی ہے یہ گرمیٔ بازار محبت

ہر بوالہوس اس جنس کا ہوتا نہیں خواہاں

جاں باختگاں ہوویں خریدار محبت

ثابت قدم اس رہ میں جو ہیں جو شمع کے مانند

سر دیتے ہیں کرتے نہیں اظہار محبت

اے لالہ رخاں اس کے تئیں داغ نہ سمجھو

پھولے ہیے مرے سینے میں گلزار محبت

اے شیخ قدم رکھیو نہ اس راہ میں زنہار

ہے سجدہ شکن رشتۂ زنار محبت

گو ہم سے چھپایا بھی تو بیدار و لیکن

انکار بھی تیرا ہے یہ اقرار محبت

رہتا ہے مری جاں کہیں عشق بھی مخفی

ظاہر ہے تری شکل سے آثار محبت