یہ لذت اور قصوں میں کہاں ہے

یہ لذت اور قصوں میں کہاں ہے

ہماری داستاں اک داستاں ہے

تماشہ تو یہی ہے وہ خود آرا

عیاں ہو کر بھی نظروں سے نہاں ہے

کسی پر جان دے گا کب تک اے دل

ارے کم بخت جی ہے تو جہاں ہے

مقدر سے ہے بعد و قرب لیلی

کوئی مجنوں ہے کوئی سارباں ہے

شب غم دیکھتا ہوں اٹھ کے ہر بار

وہی ہے یا کوئی اور آسماں ہے

نہیں چلتی کوئی تدبیر غم میں

یہی کیا کم ہے جو آنسو رواں ہے

پہنچ جاتی ہے کسی کے گوش دل تک

ہماری آرزو اتنی کہاں ہے