عشق کی آئینہ داری جذبۂ کامل میں ہے

عشق کی آئینہ داری جذبۂ کامل میں ہے

وہ مرے دل میں ہے پہلے سے جو ان کے دل میں ہے

بے کہے سب دل بتاتا ہے جو لائے گا پیام

میں سر منزل ہوں اور قاصد رہ منزل میں ہے

ایک حد تک تو بہت کچھ کہہ گئے اپنی سی تم

اس پہ بھی باقی نہیں معلوم کیا کچھ دل میں ہے

جزرومد تو بحر ہستی ہی میں ہیں اسباب زیست

کچھ سکوں ہے بھی اگر تو اضطراب دل میں ہے

گو مگر حالت ہے اپنی حسرت دیدار میں

میرا جینا اور مرنا بھی عجب مشکل میں ہے

سنگ دل اتنا بھی یارب کوئی دنیامیں نہ ہو

تیر ہے چٹکی میں اس کی زخم اس کے دل میں ہے

ٹھوکریں کیوں کوبکو کھاتا ہے آخر اے نہادؔ

ڈھونڈتا پھرتا ہے تو جس کووہ تیرے دل میں ہے