چھپ اس طرح کہ ترا عکس بھی دکھائی نہ دے

چھپ اس طرح کہ ترا عکس بھی دکھائی نہ دے

تری صدا تری آواز بھی سنائی نہ دے

وہ ظلمتیں ہیں رہ زیست میں قدم بہ قدم

چراغ دل بھی جلائیں تو کچھ سجھائی نہ دے

اس آرزو سے حذر خوئے زندگی سے حذر

جو تاب و طاقت اظہار لب کشائی نہ دے

صلیب و دار سے ہوگا معانقہ اپنا

تو میرے ہاتھ میں اپنی حسیں کلائی نہ دے

تھکن بھی ساتھ ہے میرے تھکن کا سایہ بھی

مرے جلال کو طعن شکستہ پائی نہ دے

ہوئی قلم رو نظارہ نور سے خالی

بجز دھوئیں کے کہیں روشنی دکھائی نہ دے

عطا ہوئی ہے قلم کی سکندری ہم کو

ہمارے ہاتھ میں تو کاسۂ گدائی نہ دے

یہ مجھ سے کہتا ہے اخترؔ نگار نا خواندہ

کہ خون میں ڈوبی زیست کی دہائی نہ دے