داور حشر یہ ہے حشر میں ارماں مجھ کو

داور حشر یہ ہے حشر میں ارماں مجھ کو

بدلے جنت کے ملے کوچۂ جاناں مجھ کو

لے گئے لے گئے دل کر گئے بے جاں مجھ کو

دے گئے دے گئے داغ غم ہجراں مجھ کو

میں تو کعبے کی طرف دل کو چلا تھا لے کر

لے چلا دل طرف کوچۂ جاناں مجھ کو

اشک شوئی غم فرقت میں یونہی ہوتی ہے

ہنس دیا کرتے ہیں وہ دیکھ کے گریاں مجھ کو

جس طرف کوچۂ قاتل میں گزر ہوتا ہے

نظر آتے ہیں ادھر موت کے ساماں مجھ کو

مری تقدیر کہ تم سا تو مسیحا پایا

اور پھر بھی نہ ملا درد کا درماں مجھ کو

یوں اکیلے ترا جانا نہیں اچھا سر حشر

ساتھ لے لے بت غارت گر ایماں مجھ کو

کافر عشق بتاں ہوں میں تعجب ہے جگرؔ

کیوں مسلمان سمجھتے ہیں مسلماں مجھ کو