دیکھا تجھے تو کھو گیا اپنے خیال میں

دیکھا تجھے تو کھو گیا اپنے خیال میں

کیا آئینے کی شان ہے تیرے جمال میں

جلووں میں تیرے کھو گئی دنیا نگاہ کی

عالم میں اب جمال ہے عالم جمال میں

آئینے میں کہاں وہ تمنا کی زینتیں

اپنا جمال دیکھیے میرے خیال میں

ہے تو ہی زیب بت کدۂ قال بھی مگر

کچھ اور ہے تو کعبۂ ارباب حال میں

مانا کہ ہے رقیب بھی تیری ہی اک جہت

لازم ہے امتیاز جمال و جلال میں

روٹھے تو ان پہ چھا گئی کچھ اور بھی بہار

بیٹھے ہوئے ہیں محویت بے خیال میں

میکشؔ مرے گناہ کی کرامت نہ پوچھئے

وہ خود ہے شمع مری شب انفعال میں