دل لے کے پوچھتے ہو کہ دل دار کون ہے

دل لے کے پوچھتے ہو کہ دل دار کون ہے

ہم کس طرح کہیں کہ طرح دار کون ہے

ویران دل کو دیکھتے ہیں دم بدم فزوں

مقدور کیا ہے کہیے ستم گار کون ہے

کہتا ہے فہم ظاہر و مظہر تو ایک ہے

پھر کہیے اس جہاں میں نمودار کون ہے

بخشے جو دل کی زندگی اور مستمع کو دید

ایسے کلام پاک سے بیزار کون ہے

بے دست و پاؤں جاتے ہیں لاکھوں ہی جس کے ساتھ

بارے کہو یہ قافلہ سالار کون ہے

رندی و مستی شوق سے کر عشقؔ ہم سے سن

جب وہ ہوا غفور گنہ گار کون ہے