دل نے تو الفت پنہاں کو نہ اصلا کھولا

دل نے تو الفت پنہاں کو نہ اصلا کھولا

چشم تر تو نے میرا حیف یہ پردا کھولا

آہ کچھ ہم کو نہ تھی فرصت یک دم کی خبر

اے حباب لب جو تو نے یہ عقدا کھولا

بند بند اس کی جدا کیجے یہی ہے جی میں

جان من بند قبا جس نے تمہارا کھولا

سر عشاق پہ کیوں کر نہ بلا نازل ہو

تو نے اے رشک پری شام کو جوڑا کھولا

قید الفت میں وہ ہے چیں کہ قمری نے آہ

اپنی گردن کا نہ منقار سے پھندا کھولا

کٹ گیا پنجۂ مہر شفق آلود سحر

تو نے کیا دست حنا بستۂ نگارا کھولا

یہ بھی قسمت کا لکھا اپنی کہ اس نے یارو

لے کے خط ہاتھ سے قاصد کی نہ میرا کھولا