کلیوں کے دہن باد صبا کھول رہی ہے

کلیوں کے دہن باد صبا کھول رہی ہے

یہ تیز ہوا آج بہت بول رہی ہے

محفل میں نظر جانے کدھر پڑ گئی میری

کشتی یہ مرے دل کی بہت ڈول رہی ہے

نیندوں کو ترے نام جو منسوب کروں تو

خوابوں کی پری اڑنے کو پر تول رہی ہے

مغرور نہ ہوجائے کہیں ان کا تبسم

یہ شئے بھی گھڑی بھر کی جو انمول رہی ہے

تصویر تری دیکھنے والوں نے کہا ہے

خاموش ہیں لب اور نظر بول رہی ہے

جاویدؔ نگاہوں سے وہ اوجھل تو ہے لیکن

آواز مگر کانوں میں رس گھول رہی ہے