نظر کا نور جگر کا قرار ہو جاؤں

نظر کا نور جگر کا قرار ہو جاؤں

وہ یار جاں ہے تو میں جان یار ہو جاؤں

میں اپنا راز محبت جو آشکارا کروں

خرد کے ہاتھوں ابھی سنگسار ہو جاؤں

اٹھا کے قدموں سے جس کو گلے لگایا تھا

وہ سوچتا ہے کہ سر پر سوار ہو جاؤں

ابھی تو مجھ کو نظر کا شکار کرنا ہے

ابھی سے کیسے نظر کا شکار ہو جاؤں

بہت دنوں سے نہیں آئی ہے بہار سو اب

بہار آئے تو نذر بہار ہو جاؤں

جہاں بھی دیکھوں زمانے میں نفرتیں امجدؔ

دلوں کے بیچ محبت کا تار ہو جاؤں