اس کی چشم مست سے چھلکے ہے وہ صہبائے ہوش

اس کی چشم مست سے چھلکے ہے وہ صہبائے ہوش

بنتے جاتے ہیں جنوں کے جام بھی مینائے ہوش

ہوش کو بے ہوشیوں کا ہوش کچھ آتا نہیں

ہوش کو بے‌ ہوشیوں کا کاش کچھ آ جائے ہوش

مائل آسودگی قیس جنوں کو دیکھ کر

احتیاطاً ہوش کے محمل میں ہے لیلائے ہوش

چونکتے ہیں ایسے ان کو دیکھ کر اہل جمال

دفعتاً جیسے کسی بے ہوش کو آ جائے ہوش

ہیں نظر اپنی بچا کر چل رہے ہیں اس لئے

وہ سمجھ بیٹھے ہیں اپنے آپ کو بابائے ہوش

بن معمائے جنوں ایسا جو امجدؔ حل نہ ہو

خود الجھ جائے اگر تجھ کو کبھی سلجھائے ہوش