وہ کہتے ہیں انجام محبت ہی الگ ہے

وہ کہتے ہیں انجام محبت ہی الگ ہے

کیا کیجیے اپنی تو طبیعت ہی الگ ہے

خود بیں و خود آگاہ کوئی دور کوئی پاس

یہ منزل عرفاں کی مسافت ہی الگ ہے

حیرت سے نہ یوں دیکھ میں آئینہ ہوں تیرا

انداز مرا تیری بدولت ہی الگ ہے

سب کچھ جو لٹاتا ہے کماتا ہے وہ سب کچھ

بازار محبت کی تجارت ہی الگ ہے

ہے کام نظر کا بھی نظر کا بھی نہیں کام

یہ عشق کی نظروں کی حقیقت ہی الگ ہے

مل بیٹھ کے دہراتے ہیں محبوب کے قصے

اس حسن کے مستوں کی رقابت ہی الگ ہے

اعلان کریں جس کا نبی منبر خم سے

امجدؔ مرے مولیٰ کی ولایت ہی الگ ہے