محوِ حیرت ہیں جمال چشمِ دلبر دیکھ کر

محوِ حیرت ہیں جمال چشمِ دلبر دیکھ کر

مست و بے خود ہوگئے ہم مئے کا ساغر دیکھ کر

غیظ سے ان کے عیاں ہے میری بدبختی کا راز

پڑھ لیا قسمت کا لکھا ہم نے تیور دیکھ کر

جان تک جائے تو کچھ پروا نہیں جانباز ہیں

ہم نہیں ڈرتے کبھی شمشیر و خنجر دیکھ کر

وہ مظالم ہم پہ ڈھائے ہیں کہ پتھر کا بھی دل

پانی پانی ہوگیا جورِ ستم گر دیکھ کر

نقد دل لے کر، نگاہیں پھیر کر، وہ چل دیے

کیوں نہ حسرت ہو مجھے اپنا مقدر دیکھ کر

ساری امیدیں مبدل ہوگئی ہیں یاس سے

اپنی قسمت دیکھ کر اپنا مقدر دیکھ کر

بے رخی دوست، بیتابئ دل جورِ فلک

رونا آتا ہے مجھے اپنا مقدر دیکھ کر

فخرؔ! افسانے میں تیرے ہے قیامت کا اثر

دل پھٹا جاتا ہے تیرے غم کا دفتر دیکھ کر