بلبل کو ہے تصور ہر لحظہ یار تیرا

بلبل کو ہے تصور ہر لحظہ یار تیرا

ہر گل میں جلوہ گر ہے نقش و نگار تیرا

ہے سب ظہور تیرا تو ہی ہے سب میں ظاہر

ہر چیز سے عیاں ہے حسن و بہار تیرا

جدھر نظر پڑی ہے تیرے سوا نہیں ہے

آنکھوں میں چھا رہا ہے نور عذار تیرا

نیرنگیوں نے تیرے کیا حیرتیں دکھائیں

آنکھوں میں نشہ تیرا سر میں خمار تیرا

سر میں نہیں رہا ہے اندیشۂ خرابی

سر خاک راہ تیرا سینہ فگار تیرا

اس عشق کی بدولت ہے فردؔ کی یہ حالت

حال دردمند تیری دل بے قرار تیرا