داغ وہ داغ ہے دل میں جو نمایاں نہ ہوا

داغ وہ داغ ہے دل میں جو نمایاں نہ ہوا

درد وہ درد ہے جس درد کا درماں نہ ہوا

نہ ہوا وصل کا تقدیر میں ساماں نہ ہوا

گھر تو گھر وہ تو کبھی دل میں بھی مہماں نہ ہوا

ہجر کی دن میں کمی وصل کے شب کی نہ ہوئی

وصل کی رات میں طول شب ہجراں نہ ہوا

دامن غیر کو وہ کھینچ کے یوں چاک‌ کریں

رشک آتا ہے یہ میرا ہے گریباں نہ ہوا

خط کی بدلی میری تصویر ہے لے جا قاصد

حال وہ کیا ہے جو صورت سے نمایاں نہ ہوا

فوقؔ میں درد کا قائل ہو رہا پہلو میں

اور کوئی بھی شریک شب ہجراں نہ ہوا

کیا کہوں حال میں اس دم کے پشیمانی کا

اس بزم میں کوئی میرا پرساں نہ ہوا