اے چشم تصور کیا کہنا کیا خوب نظارے ہوتے ہیں

اے چشم تصور کیا کہنا کیا خوب نظارے ہوتے ہیں

ہاتھوں میں کنارے ہوتے ہیں آنکھوں میں اشارے ہوتے ہیں

جو کچھ میں جنوں میں بکتا ہوں یا وہ سمجھیں یا میں سمجھوں

جو عام سمجھ میں نہیں آتے ایسے بھی اشارے ہوتے ہیں

اس دل کی لگی سے ڈرتا ہوں یہ جان و تن نہ جل جائیں

چنگاری سے شعلہ ہوتا ہے شعلے سے شرارے ہوتے ہیں

اک رنگ نہیں ہے فقیروں کا گدڑی میں بھی پوشاک میں بھی

ہررخ سے سمندر کی ہی طرف دریاؤں کے دھارے ہوتے ہیں

جو کشتہ تیغ محبت ہیں ان کے ہی لیے ہے فوقؔ بقا

مرنے کے بہانے در پردہ جینے کے سہارے ہوتے ہیں