فضائے گوشۂ دل میں تجھے جب جلوہ گر دیکھا

فضائے گوشۂ دل میں تجھے جب جلوہ گر دیکھا

مری نظروں نے حیرت سے مجھی کو عمر بھر دیکھا

توقع سے ترے فضل و کرم کو بیشتر دیکھا

مجھے شرم آ گئی جب اپنا دامن مختصر دیکھا

رہا لب تشنۂ تسکیں مرا امکان نظارہ

اگرچہ دیکھنے کی طرح تجھ کو عمر بھر دیکھا

تصور کی حدوں کو ناز تھا جن کی تجلی پر

نظر والوں نے ان جلووں کو تا حد نظر دیکھا

سب اپنے دل میں اک تیر نظر محسوس کرتے ہیں

مگر کوئی بتا سکتا نہیں اس نے کدھر دیکھا

ترے سجدوں سے مطلب تھا مکان و لا مکاں کیسا

نہ ہم نے رہگزر دیکھی نہ ہم نے سنگ در دیکھا

نظر آتا نہ تھا جو گرد افکار و حوادث میں

وہ ساحل آنکھ نے طوفان غم میں ڈوب کر دیکھا

مذاق عشق کو آزاد قید رنگ و بو دیکھا

جنوں کو بے نیاز بندش دیوار و در دیکھا

دل یک قطرہ خوں اس میں سوز و اضطراب اتنا

ذرا سی چیز میں ہنگامۂ برق و شرر دیکھا

تمہارے سنگ در کو سنگ در اب کس طرح کہہ دوں

کہ جب سجدہ کیا سر کو جبین عرش پر دیکھا

وہ آئے نزع میں تجدید کرنے رسم الفت کی

بڑھا دی داستاں جب میرا قصہ مختصر دیکھا

عجب منزل تھی اے سیمابؔ اپنی منزل ہستی

نہ دم لینے کی فرصت تھی نہ یارائے سفر دیکھا