ہر اک ساغر سے سوز مے عیاں معلوم ہوتا ہے

ہر اک ساغر سے سوز مے عیاں معلوم ہوتا ہے

صراحی جب اٹھاتا ہوں دھواں معلوم ہوتا ہے

خوشی کا تذکرہ بھی اب گراں معلوم ہوتا ہے

غم ہستی حیات جاوداں معلوم ہوتا ہے

تصور میں قفس سے روشنی کے ڈھونڈنے والے

گلابی گل چراغ آشیاں معلوم ہوتا ہے

بلندی سر جھکاتی ہے اگر ہو جذب پستی میں

زمین دل پہ عکس آسماں معلوم ہوتا ہے

خموشی بھی چمن کی ترجمانی کرتی رہتی ہے

زبان گل پہ حسن داستاں معلوم ہوتا ہے

چمن میں رہ کے جس گل نے مزاج باغباں بدلا

وہی دنیا کی نظروں میں گراں معلوم ہوتا ہے

جبین فضلؔ جھکتی ہے تو انوار حقیقت میں

جو سجدہ ہے وہ روح آستاں معلوم ہوتا ہے