زمیں کے دوش پہ ٹھہرے کہ عرش پر ٹھہرے

زمیں کے دوش پہ ٹھہرے کہ عرش پر ٹھہرے

ہزار جلووں میں کس طرح اک نظر ٹھہرے

بہ جبر دل نے بٹھایا قریب در ٹھہرے

ارادہ پہلے کچھ اور تھا مگر ٹھہرے

تری نگاہ کے جلوے نہ ہو سکے محدود

کچھ آسماں پہ رہے کچھ زمیں پہ ٹھہرے

یہ دیدنی ہے گلستاں کی آتی جاتی بہار

وہی ہے پھول کہ جس پر تری نظر ٹھہرے

اصول عشق پہ قائم رہے نظام وفا

جہاں پہ شام تھمی تھی وہیں سحر ٹھہرے

دھڑکتے دل کا قلم راز آخری لکھ دے

ذرا سی دیر اگر تیرا نامہ بر ٹھہرے

نہ شرط شمع ہے کوئی نہ قید پروانہ

وہی ہے دل جو محبت کی آنچ پر ٹھہرے

چمک چمک کے مرے آنسوؤں سے ٹکرا کر

ستارے صبح کی حسرت میں رات بھر ٹھہرے

نہ فضلؔ غم میں سکوں ہے نہ ہے خوشی میں قرار

بتا دوں راز محبت یہ دل اگر ٹھہرے