عشق مرض بھلا نہیں جس کو ہوا جیا نہیں

عشق مرض بھلا نہیں جس کو ہوا جیا نہیں

ہوش مرے بجا نہیں دیکھیے کیا ہو کیا نہیں

جور و جفا قبول سب ایک یہی ہے قہر اب

غیر کے ساتھ روز و شب اس کے ہم آشنا نہیں

گشت گلی گلی میں ہے دل تیرے جی کی جی میں ہے

خیر ابھی اسی میں ہے تجھ کو کوئی ملا نہیں

قافلہ کر گیا سفر آہ پھرے ہے تو کدھر

جلد خبر لے بے خبر فکر ہے اپنی یا نہیں

کس سے کہے کوئی دلا مرتے ہیں آکے تو جلا

درد ملا تو وہ ملا جس کی کہیں دوا نہیں

جی ہے بتنگ فدویؔ اب کب تئیں رہیے جاں ببلب

دیکھ لیا جہان سب زندگی کا مزا نہیں