میں کہاں اور صحبت اس مغرور کی

میں کہاں اور صحبت اس مغرور کی

تھی کبھی صاحب سلامت دور کی

مہر و مہ کو تجھ سے کیا نسبت مگر

یہ ہی کچھ ہوگی تجلی طور کی

ناز برداری کی طاقت کس میں ہے

آپ میں ہو سکتی تا مقدور کی

تیرے ہوتے یہ ہوس زاہد رکھے

ہے قصور اس کا تمنا حور کی

ہم کو گرچیں برجبیں ہو کر ملے

سلطنت ہو تو نہ لیں فغفور کی

ہے حریفِ دل یہ خلوت گاہ دوست

روشنی ہے یاں اسی کے نور کی

تجھ کو فدویؔ مضطرب دیکھوں ہوں کیوں

کیا خبر تیرے دلِ رنجور کی